Cadmia, Botritis, Tutia Alexandrina, Arabice Climia et Catimia, materia quae ex Pyrite aeroso in fornacibus usto elevatur & lateribus concameratis & in arcum constructis virgis ferreis adhaeret, et ex qua construitur Aurichalcum. quod Avicenna vocat Allaton [Al-Laton] dicens, in Dictione quinta, Allaton fit ex tribus libris cupri et tribus unciis Tutiae Praestantior advehitur ex Alexandria Aegypti et Syria et inde Tutia Alexandrina dicitur. Ex hac fit unguentum de Tutia consuetum officinis. Tenuissima et suprema pars fumi in ipso fornacum ore Capnitis dicitur exusta et nimia levitate similis favillae. Ex hac lota fit Pompholix Graecorum. Media optima est, cameris dependens et inde Botritis cognominata. Ponderosior haec priore, levior secuturis. Duo ejus colores; deterior cinerius, pumiceus melior; friabilis, oculorumque medicamentis utilissima. Tertia est in lateribus fornacum quae propter gravitatem ad cameras pervenire non potuit, & Placitis vel Zonitis dicitur, crusta utique verius existens quam pumex. Fluunt ex hac duo alia genera, superius Onychitis, extra pene caerula intus Onychis maculis similis; et inferius Ostracitis, tota nigra et caeterarum sordidissima. Horum quae infra [illeg.] Cameras sunt pars aliqua Spodium dicitur. Cadmia autem dicitur pars illa media Botritis a Cadmo Faenice qui Thebas in Boeotia condidit & modum docuit conflandi metalla. haec est Cadmia factitia et proprie Cadmia. Nam Cadmia etiam dicitur lapis Cadmiae, id est minera omnis ex qua Cadmia sine aere elicitur, et quandoque etiam funditur ad Aurichalcum conflandum. Plin. lib. 34. c: 10. Canepar. Decript 1. cap. 3. p. 10. & seq.